Në Gjykatën Themelore të Prishtinës, Departamenti Special, u mbajt sot (8 gusht) seanca dëgjimore ndaj Igor Popoviqit, ndihmësdrejtor në të ashtuquajturën “Zyrë për Kosovë” në Qeverinë e Serbisë. Gjatë seancës, gjykata aprovoi marrëveshjen për pranim të fajësisë, të arritur mes Popoviqit dhe Prokurorisë Speciale të Republikës së Kosovës.
Popoviq u soll i prangosur në gjykatë dhe u paraqit para gjyqtarit Kujtim Krasniqi dhe prokurores speciale Firkrije Zejnullahu. Sipas marrëveshjes së aprovuar, dënimi me 6 muaj burgim do të zëvendësohet me një gjobë prej 3 mijë eurosh, ndërsa atij i është shqiptuar edhe masa plotësuese e dëbimit nga territori i Kosovës për një periudhë prej dy vitesh.
Prokurorja Zejnullahu theksoi se marrëveshja është në përputhje të plotë me ligjin dhe se i akuzuari ka qenë i konsultuar me avokatin e tij. Edhe mbrojtësi i Popoviqit, avokati Millosh Deleviq, e konfirmoi vlefshmërinë e marrëveshjes dhe përputhshmërinë e saj me dispozitat ligjore.
Igor Popoviq ishte arrestuar më 19 korrik në pikën kufitare të Bërnjakut. Më 5 gusht, Prokuroria Speciale kishte ngritur aktakuzë ndaj tij për nxitje të përçarjes dhe mosdurimit ndëretnik, lidhur me një deklaratë publike kundër UÇK-së të mbajtur në Rahovec më 18 korrik 2025. Sipas aktakuzës, ai me qëllim kishte nxitur urrejtje dhe mosdurim mes grupeve etnike.
