Presidentja e Meksikës, Claudia Sheinbaum, deklaroi këtë fundjavë se Shtetet e Bashkuara nuk do të dërgojnë ushtrinë në territorin meksikan, duke reaguar ndaj raportimeve që thonë se Presidenti amerikan Donald Trump ka urdhëruar Pentagonin të ndërmarrë veprime ushtarake kundër karteleve të drogës në Amerikën Latine.
“Shtetet e Bashkuara nuk do të hyjnë në Meksikë me ushtri. Ne bashkëpunojmë, por nuk do të ketë pushtim. Kjo është absolutisht e përjashtuar,” theksoi Sheinbaum në një deklaratë të shtunën.
Gazeta The New York Times raportoi se Trump ka nënshkruar në fshehtësi një urdhër për përdorimin e forcës ushtarake jashtë kufijve amerikanë. Megjithatë, Shtëpia e Bardhë nuk e konfirmoi drejtpërdrejt këtë dokument, duke theksuar se prioriteti kryesor i presidentit është “mbrojtja e atdheut”.
Ky lajm vjen pas një urdhri ekzekutiv të Trump-it, sipas të cilit tetë kartelë droge, përfshirë gjashtë meksikanë, u shpallën organizata terroriste. Sheinbaum u shpreh se Meksika është informuar për këtë urdhër, por se ai “nuk përfshin angazhimin e forcave ushtarake” dhe “nuk është pjesë e ndonjë marrëveshjeje”.
Ndërkohë, Sekretari amerikan i Shtetit, Marco Rubio, tha të enjten se ky vendim do të ndihmojë luftën kundër karteleve, duke përdorur agjencitë e inteligjencës dhe Departamentin e Mbrojtjes. The New York Times nënvizoi se urdhri i Trump-it “hap rrugën për operacione ushtarake direkte” kundër karteleve, si në ujë ashtu edhe në territor të huaj.
Në muajt e fundit, Meksika dhe SHBA-ja kanë bashkëpunuar ngushtë për të kontrolluar flukset e emigrantëve dhe trafikimin e drogës në kufirin e përbashkët. Sipas Doganës dhe Mbrojtjes Kufitare amerikane, qershori shënoi nivelin më të ulët të kalimeve të paligjshme, ndërsa sekuestrimet e fentanilit ranë mbi 50%. Ambasadori amerikan në Meksikë, Ronald Johnson, vlerësoi bashkëpunimin, duke thënë se “kartelët janë në falimentim dhe vendet tona janë më të sigurta”.
