Komuna e Lipjanit, nën drejtimin e kryetarit Imri Ahmeti, organizoi sot në Sheshin “Adem Jashari” Panairin Rinor në kuadër të programit “Rinia Fest 2025”, një ditë e dedikuar plotësisht të rinjve dhe kreativitetit të tyre.
Atmosfera festive u gjallërua nga një sërë aktivitetesh argëtuese dhe krijuese. Të rinjtë patën mundësinë të provojnë për herë të parë eksperiencën unike të Syzeve VR, duke u zhytur në botë virtuale me lojëra interaktive dhe aventura digjitale.
Punëtoritë e argjilës ofruan hapësirë për shprehje artistike, ku pjesëmarrësit krijuan objekte unike të cilat i morën me vete si kujtim nga kjo ditë e veçantë.
Përveç kësaj, ngjarja u shoqërua me muzikë, lojëra argëtuese dhe dhurata surprizë, duke e kthyer “Rinia Fest 2025” në një përvojë të paharrueshme për të rinjtë lipjanas.
