Ministria e Drejtësisë (MD) ka kërkuar nga Këshilli Prokurorial dhe Këshilli Gjyqësor i Kosovës nisjen e menjëhershme të procedurave disiplinore ndaj prokurorëve dhe gjyqtarëve të përfshirë në lirimin me dorëzani të Mefail dhe Edonis Shkodrës, tashmë të dyshuar për vrasjen e trefishtë në Gjilan.
Në reagimin e saj, MD e ka cilësuar vendimin për lirimin e tyre si “të pakuptueshëm dhe të papranueshëm”, duke theksuar se të dy të dyshuarit kishin qenë më parë në paraburgim për fajde dhe detyrim, por u liruan nga Gjykata Themelore në Prishtinë me kërkesë të Prokurorisë Speciale.
“Lirimi i tyre përbën një neglizhencë të rëndë institucionale dhe ka prodhuar pasoja tragjike e të pariparueshme”, thuhet në komunikatë.
MD ka apeluar edhe te forcat politike që të ndalojnë pengesat ndaj reformave në sistemin e drejtësisë, duke theksuar se këto reforma janë një domosdoshmëri për garantimin e sigurisë, drejtësisë dhe paqes sociale.
“Drejtësia nuk është pronë e askujt. Pa një drejtësi funksionale, nuk mund të ketë siguri apo paqe sociale”, përfundon reagimi.
