Gazetari Shkëlzen Dakaj ka reaguar pas vendimit të fundit të shkallës së dytë të Gjykatës Komerciale, e cila ka miratuar ankesën e Zyrës së Rregullatorit për Energji (ZRRE) dhe ka refuzuar kërkesën për shtyrjen e ekzekutimit të daljes së bizneseve në tregun e lirë të energjisë elektrike.
I ftuar në emisionin “FIVE” në Dukagjini, Dakaj e cilësoi këtë vendim si favor për ZRRE-në, duke shtuar se edhe ekspertë të fushës e kanë quajtur atë juridikisht të pakuptimtë.
“Shkalla e dytë e Gjykatës Komerciale e përmbysi të gjitha ato për të cilat ne u munduam, ose për të cilat bizneset pritën, pasi e fituan një betejë përballë ZRRE-së. Që nga fillimi kemi thënë se ky vendim ishte më shumë politik sesa i domosdoshëm, dhe se bizneset nuk ishin të përgatitura për të dalë në tregun e hapur. Aq më tepër, siç kemi theksuar vazhdimisht, nuk kishte kuptim të dilje në treg të hapur kur nuk kishte konkurrencë dhe tregu nuk ishte i përgatitur,” tha Dakaj.
Ai e përshkroi situatën si një “anomali” që pasqyron gjendjen e përgjithshme në vend. “Shkalla e dytë rrëzoi vendimin e shkallës së parë dhe i dha të drejtë ZRRE-së. Edhe avokati më i mirë i kësaj fushe ka thënë se ky është vendimi më absurd, sepse nuk ka logjikë juridike kjo punë,” theksoi ai.
