Ish-kryeministri i Kosovës dhe deputeti i LDK-së, Avdullah Hoti, ka reaguar ashpër ndaj entuziazmit të Zyrës së Rregullatorit të Energjisë (ZRRE) për vendimin që detyron bizneset të dalin në tregun e hapur të energjisë elektrike, pavarësisht mungesës së kushteve të nevojshme për një veprim të tillë.
Sipas Hotit, ky hap po i ekspozon bizneset ndaj çmimeve shumë më të larta se ato që paguajnë aktualisht, duke rrezikuar konkurrueshmërinë dhe stabilitetin e tyre financiar.
“Çfarë entuziazmi i Zyrës së Rregullatorit të Energjisë për t’i detyruar bizneset të blejnë energjinë në treg të hapur, ku çmimi është disa herë më i shtrenjtë se çmimi që paguajnë tani?! Çfarë apatie e Qeverisë për këtë situatë të krijuar?! Kësaj situate, jo vetëm që i vjen era, por kundërmon”, ka shkruar Hoti.
Ky reagim vjen në një moment kur ekosistemi energjetik i vendit nuk është i përgatitur për një liberalizim të tillë dhe se vendimi është marrë pa strategji dhe pa analiza të thelluara mbi pasojat ekonomike.
