Tensionet në Lindjen e Mesme po rriten ndjeshëm, pasi Shefi i Shtabit të Ushtrisë izraelite, gjeneral-lejtnant Eyal Zamir, ka miratuar sot konceptin kryesor të planit operacional për ofensivën në Rripin e Gazës.
Diskutimi u zhvillua të mërkurën me pjesëmarrjen e Forumit të Shtabit të Përgjithshëm, përfaqësuesve të Shërbimit të Sigurisë së Brendshme (Shin Bet) dhe komandantëve të tjerë të lartë.
Gjatë takimit, u prezantuan veprimet e deritanishme të Forcave të Mbrojtjes së Izraelit (IDF), përfshirë sulmin në zonën Zeitoun që nisi dje, si dhe u paraqit dhe u miratua struktura e operacioneve të ardhshme në Gaza, në përputhje me udhëzimet e nivelit politik.
Shefi i Shtabit theksoi nevojën për rritjen e gatishmërisë së trupave dhe përgatitjen për mobilizimin e rezervistëve, duke kërkuar një fazë rikuperimi dhe rifreskimi për forcat para nisjes së misioneve të reja.
Ky zhvillim vjen në një moment kritik, kur rajoni po përjeton një përshkallëzim të ndjeshëm të situatës, dhe sinjalizon një fazë të re të mundshme të konfrontimit ushtarak.
Vendimi për miratimin e planit operacional ngre shqetësime për një intensifikim të luftës në Gaza, me pasoja të paparashikueshme për civilët dhe stabilitetin rajonal.
