Administrata e presidentit të Shteteve të Bashkuara, Donald Trump, ka prezantuar para kontraktorëve të mbrojtjes planet për sistemin e ri të mbrojtjes raketore “Golden Dome”, me vlerë 175 miliardë dollarë. Sipas agjencisë Reuters, planet përfshijnë ndërtimin e një fushe të re raketore në rajonin e Midwest-it amerikan, si dhe detaje për aftësinë e sistemit për të shkatërruar raketat armike që nga hapësira.
Në një seri slajdesh të titulluara “Go Fast, Think Big!”, të prezantuara javën e kaluar në Huntsville, Alabama, para rreth 3 mijë kontraktorëve të mbrojtjes, janë zbuluar tre shtresa të interceptorëve të raketave, sisteme radarësh, lazerë dhe mbrojtje të bazuara në hapësirë.
Prezantimi theksonte se SHBA ka ndërtuar më parë si interceptorë, ashtu edhe automjete ri-hyrëse për mbrojtje nga raketat në hapësirë, por pranon se vendi nuk ka krijuar kurrë një automjet që mund të përballojë nxehtësinë e ri-hyrjes në atmosferë ndërkohë që synon një raketë armike.
Trump ka vlerësuar koston e “Golden Dome” në rreth 175 miliardë dollarë. Deri më tani, Kongresi ka aprovuar 25 miliardë dollarë për sistemin në ligjin e taksave dhe shpenzimeve të miratuar në korrik, ndërsa 45.3 miliardë të tjerë janë parashikuar në kërkesën buxhetore presidenciale për vitin 2026.
Një zyrtar amerikan i cituar nga Reuters tha:
“Ata kanë shumë para, por ende nuk kanë një shënjestër të saktë për koston finale.”
Sipas planeve, fusha e re raketore – e pajisur me sisteme të ndërtuara nga Lockheed Martin – do të shtohet përkrah dy fushave ekzistuese në Kaliforninë Jugore dhe Alaska.
Lockheed Martin e ka përshkruar “Golden Dome” si “një sistem mbrojtjeje që mbron Amerikën nga kërcënimet ajrore, raketat hipersonike dhe sulmet me dronë me shpejtësi dhe saktësi të pakrahasueshme”.
“Faleminderit vizionit të presidentit Trump, ‘Golden Dome’ do ta bëjë këtë realitet, duke siguruar të ardhmen tonë,” ka shkruar kompania në rrjetet sociale në mars.
Në prezantim nuk pati referenca për kompaninë SpaceX të Elon Musk, e cila ka konkurruar për kontrata në këtë projekt, krahas prodhuesit të softuerit Palantir dhe kompanisë së sistemeve të mbrojtjes Anduril.
Trump kishte premtuar ndërtimin e një “mburoje raketore” gjatë fushatës për zgjedhjet presidenciale të vitit 2024, duke e krahasuar atë me Iron Dome të Izraelit – një sistem që zbulon, ndjek dhe shkatërron raketat armike, i zhvilluar me mbi 1 miliard dollarë financim nga SHBA.
Vetëm disa ditë pas marrjes së detyrës më 27 janar 2025, Trump nënshkroi një urdhër ekzekutiv për të nisur menjëherë ndërtimin e një sistemi të avancuar “Iron Dome” për mbrojtjen e SHBA-së.
Megjithatë, pavarësisht sigurimit të 25 miliardë dollarëve fillestarë, projekti ende përballet me mungesë të theksuar financimi. Në maj, Trump sugjeroi se një pjesë e boshllëkut buxhetor mund të mbulohet nga Kanadaja, duke paguar 61 miliardë dollarë për këtë projekt.
