Ministria e Arsimit, Shkencës, Teknologjisë dhe Inovacionit (MAShTI) ka njoftuar se nga sot, përmes platformës e-Kosova, është hapur aplikimi për subvencionimin e teksteve dhe materialeve mësimore për nxënësit e arsimit fillor dhe të mesëm të ulët.
Për vitin shkollor 2025/2026, çdo nxënës i klasave I–V do të përfitojë 80 euro për blerjen e teksteve dhe materialeve mësimore, ndërsa nxënësit e klasave VI–IX do të marrin 80 euro për fletore pune dhe materiale shtesë. Tekstet për klasat VI–IX do të jenë nga gjeneratat e mëparshme, sipas Udhëzimit Administrativ Nr. 13/2016, një praktikë e vazhduar nga vitet e kaluara.
Këtë vit, procesi i aplikimit është thjeshtuar, pasi të dhënat bankare të prindërve janë ruajtur nga aplikimet e mëparshme. Fondet do të transferohen drejtpërdrejt në xhirollogaritë e prindërve, ashtu si në dy vitet e fundit.
Drejtoritë Komunale të Arsimit janë njoftuar paraprakisht dhe çdo aplikim do të verifikohet nga shkolla përkatëse përpara kryerjes së pagesës.
