Qytetarë të shumtë janë tubuar këtë mbrëmje në qendër të Gjilanit për të protestuar pas vrasjes së trefishtë ku humbën jetën Selami Hasani, djali i tij Edmond Hasani dhe Abedin Hoxha.
Familjarë, miq dhe bashkëpunëtorë të familjeve Hasani e Hoxha janë mbledhur para Gjykatës Themelore në Gjilan për të kërkuar drejtësi. Protestës i janë bashkuar edhe disa argjendarë të qytetit, në shenjë solidariteti me Selami Hasanin, i cili ishte argjendar.
Objekti i Gjykatës është rrethuar me shirit policor, ndërsa përpara tij janë vendosur zyrtarë policorë për të monitoruar mbarëvajtjen e tubimit. Pankarta më e madhe e protestës kishte mbishkrimin: “Sistemi i drejtësisë po vret!”. Mes protestuesve ishin edhe qytetarë që kërkonin drejtësi për vrasjen e të riut Engjëll Smërqaku, e ndodhur pesë vjet më parë.
Ngjarja tragjike ndodhi më 10 gusht, kur pranë një kafeneje në qendër të qytetit pati shkëmbim zjarri, nga i cili vdiqën menjëherë Selami dhe Edmond Hasani. Më vonë, në Spitalin e Gjilanit, ndërroi jetë edhe Abedin Hoxha nga plagët e marra.
Për këtë vrasje të rëndë, të dyshuar janë Mefail, Edonis dhe Engjull Shkodra.
