Në një reagim të qartë dhe kritik ndaj qasjes aktuale të qeverisjes në Kosovë, ish-kryeministri Avdullah Hoti ka rikujtuar standardet e sjelljes institucionale gjatë mandatit të Lidhjes Demokratike të Kosovës, duke e krahasuar me atë që ai e cilëson si “rrëshqitje drejt autokracisë partiake”.
Hoti thekson se gjatë viteve të qeverisjes së LDK-së, ka pasur mospajtime me shumë akterë publikë e privatë, por gjithmonë është ruajtur një qasje e matur dhe respektuese ndaj institucioneve dhe partnerëve:
– Me RTK-në: “Ka pasur raste kur nuk jemi pajtuar me qëndrimet apo sjelljet e tyre. Por asnjëherë nuk i kemi penalizuar me buxhet apo në ndonjë formë tjetër.”
– Me komunitetin e bizneseve: “Nuk kemi qenë gjithmonë në një mendim për politikat ekonomike. Megjithatë, asnjëherë nuk i kemi trajtuar si armiq dhe nuk i kemi luftuar. Përkundrazi, kemi insistuar në dialog e komunikim të ngushtë për të sheshuar dallimet.”
– Me Gjykatën Kushtetuese: “Ka pasur vendime që koha po tregon se kanë qenë të gabuara, të pabazuara dhe të motivuara. Por askujt në LDK nuk i ka shkuar në mendje të sulmojë Gjykatën. Gjithmonë kemi respektuar vendimet dhe kemi vepruar sipas tyre pa asnjë vonesë.”
– Me organizatat e shoqërisë civile: “Edhe kur nuk jemi pajtuar me agjendat e tyre, asnjëherë nuk i kemi luftuar. Përkundrazi, kemi rritur transparencën dhe kemi intensifikuar komunikimin publik për të arsyetuar politikat tona.”
– Me aleatët ndërkombëtarë: “Edhe kur kemi pasur mospajtime, kurrë nuk i kemi sharë apo kritikuar në publik. Përkundrazi, kemi forcuar komunikimin për të gjetur mirëkuptim.”
Sipas Hotit, kjo qasje nuk është privilegj, por detyrim i çdo qeverie normale. Ai paralajmëron se devijimi nga këto parime po e çon vendin drejt një modeli të rrezikshëm të pushtetit:
“Përndryshe, vendi rrëshqet në autokraci partiake, siç po ndodh sot.”
Hoti bën thirrje për përgjegjësi të lartë politike dhe institucionale:
“Është obligim i secilit prej nesh, në veçanti i spektrit politik, të ndalojë këtë rrëshqitje të Kosovës drejt autokracisë partiake.”
Ky reagim vjen në një moment kritik për demokracinë institucionale në Kosovë dhe do të duhej të shërbente si një kujtesë për vlerat që duhet të udhëheqin çdo qeverisje të përgjegjshme.
