Kryeministri britanik Sir Keir Starmer ka vlerësuar përpjekjet e Presidentit amerikan Donald Trump pas samitit të zhvilluar në Alaskë me homologun rus Vladimir Putin, duke i cilësuar si një hap të rëndësishëm drejt përfundimit të konfliktit në Ukrainë.
“Përpjekjet e Presidentit Trump na kanë sjellë më afër se kurrë më parë përfundimit të luftës së paligjshme të Rusisë në Ukrainë,” deklaroi Starmer, duke shtuar se “udhëheqja e tij në përpjekje për t’i dhënë fund vrasjeve duhet të përgëzohet.”
Starmer theksoi se pa pjesëmarrjen e Presidentit ukrainas Volodymyr Zelenskyy, çdo rrugë drejt paqes do të ishte e paplotë. Ai kërkoi që bisedimet e ardhshme të përfshijnë drejtpërdrejt liderin ukrainas.
Në deklaratën e tij, kryeministri britanik nënvizoi rëndësinë e garancive të sigurisë nga SHBA dhe vendet evropiane për Ukrainën, si një mjet për të penguar avancimin e mëtejshëm të Rusisë.
Ai paralajmëroi se presioni ndaj Kremlinit do të intensifikohet:
“Do të vazhdojmë të shtrëngojmë vidat në makinën e tij të luftës me edhe më shumë sanksione,” tha Starmer, duke e cilësuar ofensivën ruse si “sulm barbar”.
