Një aksion i befasishëm i Inspektoratit Komunal të Prishtinës ka bllokuar sot qarkullimin në linjën Podujevë–Prishtinë, duke lënë pa transport qindra udhëtarë të Llapit. Kompanitë e udhëtimit që operojnë në këtë relacion janë gjobitur me nga 500 euro secila, ndërsa u janë konfiskuar edhe tabelat e autobusëve – veprim ky që praktikisht ua pamundëson vijimin e punës.
Shoqata e Transportuesve reagoi menjëherë, duke e cilësuar ndërprerjen si të pavullnetshme dhe të diktuar nga veprimet e Komunës së Prishtinës. Sipas tyre, të gjitha kompanitë kanë respektuar urdhrin e qarkullimit të miratuar nga Ministria e Infrastrukturës, e cila u garanton të drejtën e përdorimit të rrugëve të zakonshme, përfshirë edhe kthimin te Xhamia e Llapit – pikërisht segmenti që Komuna e konteston.
“Jemi të detyruar të pezullojmë aktivitetin, jo pse nuk duam të punojmë, por sepse Komuna e Prishtinës po na penalizon padrejtësisht. Kemi leje nga Ministria, por jemi të trajtuar si shkelës”, thuhet në reagimin e Shoqatës.
Transportuesit kanë paralajmëruar protestë të martën, më 19 gusht 2025, në ora 08:00. Nisja do të bëhet nga Podujeva drejt Prishtinës, me destinacion Komunën e Prishtinës, ku do të kërkohet rikthimi i ndalesës te Xhamia e Llapit. Për të gjithë udhëtarët transporti do të jetë falas.
Kjo situatë jo vetëm që i ka lënë pa mjete qarkullimi qindra qytetarë të Podujevës, por ka hapur edhe një përplasje të re mes transportuesve dhe Komunës së Prishtinës.
