Aktgjykimi i Gjykatës Kushtetuese për seancën konstitutive duket se ka lënë shije të hidhur në radhët e Lëvizjes Vetëvendosje. Deputeti Arbër Rexhaj, në vend që të pranojë realitetin e shkeljeve procedurale të kryesuesit Avni Dehari – i cili uzurpoi procesin e konstituimit të Kuvendit – ka zgjedhur të sulmojë gjyqtarët kushtetues.
“Te vetmet fitore që i kanë mbetur kryetarit të LDK-së janë këto ‘fitoret’ në tavolinë të gjykatësve të kohës së PAN-it. Sepse në popull po dalin të tretit qe sa herë”, shkroi Rexhaj në Facebook, duke e zhvendosur debatin nga ligjshmëria tek nostalgjia e humbjeve të VV-së.
Ky reagim vjen pasi LDK e quajti vendimin e Kushtetueses një fitore të madhe për institucionet dhe demokracinë. Por duket se për eksponentët e VV-së, të cilët prej 6 muajsh e kanë mbajtur peng vendin pa institucione, çdo kujtesë se Kushtetuta është mbi ta rezulton e padurueshme.
Ironia është se, ndërsa Gjykata thotë se Kushtetuta është shkelur, VV vazhdon të thotë se problemi qenka “gjykata e PAN-it”. Një argument tipik i atyre që kur humbin në sallë, ia gjejnë fajin tavolinës.
