Këshilltari i kryetarit të Prishtinës, Bajram Gecaj, ka reaguar ndaj deklaratës së kandidatit të PDK-së për kryetar të kryeqytetit, Uran Ismaili, i cili premtoi se nëse fiton zgjedhjet do ta ndalojë ndërtimin e sheshit “Xhorxh Bush” dhe do ta rikthejë atë në rrugë të qarkullueshme.
Në një postim në “Facebook”, Gecaj e quajti të pabazë këtë zotim të Ismailit, duke i thënë që të merret me çështje më të rëndësishme e jo të manipulojë opinionin me premtime të parealizueshme.
“Flejë dathë Uran… sepse sheshin do ta hapë Përparim Rama – dhe atë në një formë që do t’i kenë lakmi jo vetëm shtetet e rajonit, por edhe më gjerë. Mendo përtej Uran, mos lejo të ta kufizojnë vizionin anarkistët!”, ka shkruar Gecaj.
Ai më tej e akuzon kandidatin e PDK-së dhe partinë e tij se me këtë lloj fushate po e ndihmojnë më shumë Vetëvendosjen sesa vetveten në garën për kryetar të Prishtinës.
“E njëjta po ndodhë edhe me sheshin, Uran: veçse në Kryeqytet, PDK po e ndihmon LVV-në!”, shtoi Gecaj, duke e ftuar Ismailin të kujtohet edhe për rolin e tij si deputet në Kuvend.
Ky reagim vjen në kulmin e përplasjes politike mes partive në prag të zgjedhjeve lokale, ku çështja e zhvillimit urban të Prishtinës është kthyer në një ndër temat kryesore elektorale.
