Komisioni Disiplinor i Federatës Spanjolle të Futbollit ka marrë vendim për suspendimin e sulmuesit të Kosovës, Vedat Muriqi, pas incidentit të ndodhur në ndeshjen mes Mallorcës dhe Barcelonës.
Muriqi është dënuar me një ndeshje pezullim, pasi u ndëshkua me karton të kuq për një ndërhyrje të rrezikshme ndaj portierit të Barcelonës, Joan Garcia. Episodi ndodhi gjatë sfidës së javës së parë të La Ligas, ku Mallorca u mposht me rezultat të thellë 3:0.
Në minutat e para të pjesës së dytë, Muriqi ngriti këmbën lart në një përpjekje për të kapur topin, por përfundoi duke goditur në kokë portierin kundërshtar. Fillimisht, gjyqtari e ndëshkoi me karton të verdhë, por pas ndërhyrjes së sistemit VAR, vendimi u ndryshua në karton të kuq direkt.
Vendimi i Federatës vjen si konfirmim i qasjes së saj ndaj sigurisë së lojtarëve dhe disiplinës në fushë. Mallorca do të duhet të përballojë mungesën e Muriqit në ndeshjen e radhës, ndërsa Garcia, sipas raportimeve, nuk ka pësuar lëndime serioze.
