Aeroplanët dhe tanket izraelite bombarduan periferitë lindore dhe veriore të Qytetit të Gazës gjatë natës nga e shtuna deri të dielën, duke shkatërruar ndërtesa dhe shtëpi, thanë banorët, ndërsa udhëheqësit izraelitë u zotuan të vazhdojnë me një ofensivë të planifikuar në qytet.
Dëshmitarët raportuan zhurmën e shpërthimeve pa ndërprerje gjatë natës në zonat e Zeitoun dhe Shejaia, ndërsa tanket bombarduan shtëpitë dhe rrugët në lagjen Sabra aty pranë dhe disa ndërtesa u hodhën në erë në qytetin verior të Jabalia.
Ushtria izraelite tha të dielën se forcat e saj janë rikthyer në luftime në zonën e Jabalia në ditët e fundit, për të “çmontuar” tunelet militante dhe për të forcuar kontrollin e zonës, shkruajnë mediat e huaja
Ushtria shtoi se operacioni atje “mundëson zgjerimin e luftimeve në zona të tjera dhe parandalon terroristët e Hamasit të kthehen për të vepruar në këto zona”
Izraeli miratoi një plan këtë muaj për të marrë kontrollin e Qytetit të Gazës, duke e përshkruar atë si bastionin e fundit të Hamasit.
Ai nuk pritet të fillojë për disa javë, duke lënë hapësirë për ndërmjetësit Egjipt dhe Katar që të përpiqen të rifillojnë bisedimet e armëpushimit midis palëve.
Ndërkohë, ministri i Mbrojtjes i Izraelit, Israel Katz, të dielën u zotua të vazhdojë ofensivën ndaj qytetit ku është shpallur uri ekstreme, gjë që ka ngritur alarm jashtë vendit dhe kundërshtime brenda vendit.
Katz ka thënë se Qyteti i Gazës do të rrafshohet nëse Hamasi nuk pranon të përfundojë luftën sipas kushteve të Izraelit dhe të lirojë të gjithë pengjet.
Hamasi tha në një deklaratë të dielën se plani i Izraelit për të marrë kontrollin e Qytetit të Gazës tregoi se nuk ishte serioz në lidhje me një armëpushim
Grupi tha se një marrëveshje armëpushimi ishte “e vetmja mënyrë për të kthyer pengjet”, duke e mbajtur kryeministrin izraelit Benjamin Netanyahu përgjegjës për jetën e tyre.
Propozimi në tryezë kërkon një armëpushim 60-ditor dhe lirimin e 10 pengjeve të gjallë të mbajtura në Gaza dhe të 18 trupave. Nga ana tjetër, Izraeli do të lirojë rreth 200 të burgosur palestinezë me që mbahen nga Izraeli.
Sapo të fillojë një armëpushim i përkohshëm, propozimi është që Hamasi dhe Izraeli të fillojnë negociatat për një armëpushim të përhershëm që do të përfshijë kthimin e pengjeve të mbetura.
Të enjten, Netanyahu tha se Izraeli do të rifillonte menjëherë negociatat për lirimin e të 50 pengjeve – nga të cilët Izraeli beson se rreth 20 janë ende gjallë – dhe një fund të luftës gati dyvjeçare, por me kushte të pranueshme për Izraelin
