Situata e krijuar në Kuvendin e Kosovës pas aktgjykimit të Gjykatës Kushtetuese po vazhdon të mbetet e pandryshuar. Ish-deputeti i AAK-së, Shemsedin Dreshaj, tha në emisionin Ditari në Tëvë1 se nuk po sheh gatishmëri nga partitë e mëdha për dialog e kompromis.
Sipas tij, partia në pushtet po vepron me logjikën e imponimit, ndërsa opozita nuk ka një qëndrim unik. Ai përmendi qëndrimet e ndryshme të partive: LDK kërkon marrëveshje politike para votimit, PDK refuzon çdo kandidat të kabinetit qeveritar, ndërsa AAK ka bërë oferta konkrete dhe lëshime, duke ofruar deri në 20 vota.
Dreshaj u shpreh skeptik se afati 30-ditor do të jetë i mjaftueshëm për konstituimin e Kuvendit, duke theksuar se arsyeja kryesore e bllokadës lidhet me mungesën e mbështetjes parlamentare për Qeverinë Kurti.
“Prapavija e kësaj bllokade është se z. Kurti nuk i ka votat për Qeveri, prandaj po krijohet kjo situatë,” tha Dreshaj.
