Në qytetin e Klinës u mbajt sot ceremonia përmbyllëse e projektit “Udhëtim në Kohë – Rilindja Kulturore nga Liqeni i Shkodrës në Kosovë”, një nismë që ka bashkuar komunitetet e Kosovës dhe Malit të Zi përmes promovimit të trashëgimisë së përbashkët kulturore dhe natyrore.
Ngjarja u organizua nga Fondi për Zhvillim Komunitar (CDF) në Kosovë, në partneritet me Komunën e Klinës, Qendrën për Iniciativa të Turizmit të Qëndrueshëm (CSTI) dhe Organizatën Kombëtare të Turizmit të Malit të Zi (NTO), ndërsa financimi u mundësua nga Bashkimi Evropian në kuadër të Programit të Bashkëpunimit Ndërkufitar Kosovë–Mali i Zi.
Në ceremoninë përmbyllëse morën pjesë përfaqësues të institucioneve vendore dhe qendrore, operatorë turistikë, historianë, ekspertë të trashëgimisë kulturore, si dhe media të shumta lokale. Të pranishmit u njohën nga afër me rezultatet e arritura gjatë këtij projekti dyvjeçar, i cili ka synuar të krijojë ura bashkëpunimi përmes kulturës, turizmit dhe historisë së përbashkët.
“Ky projekt ka treguar se kufijtë administrativë nuk janë barriera për kulturën dhe trashëgiminë. Përkundrazi, ato mund të bëhen ura bashkimi për komunitetet që ndajnë të njëjtën histori dhe të njëjtat vlera,” u theksua në konferencë nga organizatorët.
Rezultatet e paraqitura tregojnë një qasje gjithëpërfshirëse në zhvillimin e turizmit kulturor dhe natyror:
- Krijimi i rrugëve tematike ndërkufitare – Turistët tashmë mund të ndjekin itinerare të reja që lidhin Kosovën dhe Malin e Zi, duke zbuluar histori, vende të trashëgimisë dhe peizazhe të mbushura me rrëfime.
- Përmirësimi i infrastrukturës turistike – Me investime në shenjëzim, shtigje dhe pika ndalese, vizitorët përfitojnë një përvojë më të strukturuar dhe të qasshme.
- Trajnime për komunitetin – Operatorë turistikë, udhërrëfyes dhe anëtarë të komuniteteve lokale kanë marrë njohuri të reja për zhvillimin e turizmit kulturor, menaxhimin e vizitorëve dhe ruajtjen e trashëgimisë.
- Produkte promovuese dhe broshura turistike – Me materiale të shtypura dhe rrëfime atraktive, rajoni tani ka mjete më të mira për të tërhequr turistë vendas dhe të huaj.
- Galeria e fotografive – Një dokumentacion vizual i aktiviteteve të projektit u prezantua gjatë konferencës, duke dhënë një panoramë të plotë të udhëtimit dhe ndikimit të kësaj nisme.
Falë këtij projekti, rajoni i Liqenit të Shkodrës dhe zonat përreth në Kosovë dhe Mal të Zi kanë fituar një ofertë më të pasur turistike, duke kombinuar natyrën, historinë dhe kulturën në një përvojë të vetme.
Për komunitetet vendore, kjo nismë nuk ka sjellë vetëm rritje të interesit turistik, por edhe mundësi të reja ekonomike, punësim dhe afirmim të identitetit kulturor.
“Është një investim jo vetëm në infrastrukturë, por edhe në njerëz – në aftësitë, në kujtesën historike dhe në ndjenjën e përkatësisë,” theksuan përfaqësuesit e projektit.
Me mbylljen e “Udhëtim në Kohë”, organizatorët nënvizuan se ky është vetëm fillimi i një procesi të gjatë bashkëpunimi ndërkufitar. Investimi në rrugë tematike dhe ngritja e kapaciteteve lokale do të shërbejë si bazë për zhvillime të mëtejshme në turizmin kulturor dhe eko-turizmin, duke e pozicionuar rajonin si një destinacion unik në Ballkan.
