Bayern Munich ka regjistruar fitoren e dytë radhazi në edicionin e ri të Bundesligës (2025/26), pasi triumfoi 3-2 në udhëtim te Augsburgu, në një ndeshje dramatike që u mbyll me emocione deri në fund.
Skuadra e Vincent Kompany dominoi pjesën e parë, duke shënuar dy gola përmes Serge Gnabry (28’) dhe Luis Diaz (45’), ndërsa Michael Olise trefishoi epërsinë vetëm tre minuta pas rifillimit të lojës.
Megjithatë, Augsburg nuk u dorëzua. Kristijan Jakic ngushtoi diferencën në minutën e 51-të, ndërsa Mert Komur përfitoi nga një gabim i Sacha Boey dhe shënoi golin e dytë për vendasit në minutën e 76-të, duke ndezur ndeshjen.
Në minutat e fundit, Augsburg kërkoi barazimin, por bavarezët rezistuan presionit. Atmosfera u tensionua edhe më shumë pas një përplasjeje të rëndë kokë më kokë mes Boey dhe Fellhauer, ku ky i fundit u largua me barelë, ndërsa gjyqtari ndëshkoi Boey vetëm me karton të verdhë, vendim që zemëroi vendasit.
Statistika të ndeshjes
Bayern pati 20 goditje (10 në portë), duke regjistruar 3.82 xG.
Augsburg u ndal në vetëm 0.5 xG, me tre goditje në kuadrat.
Ky ishte triumfi i 11-të i Bayernit në 15 ndeshjet e fundit si mysafir ndaj Augsburgut (D1, L3).
Fitorja e mban Bayernin me pikë të plota pas dy xhirove të para, duke dëshmuar se edhe pse kanë punë për të bërë në mbrojtje, forca ofensive mbetet arma e tyre kryesore.
