Presidenti rus Vladimir Putin ka nisur një vizitë gati njëjavore në Kinë, e përshkruar nga Kremlini si “vërtet e paprecedentë”. Udhëtimi përkon me samitin e Organizatës së Bashkëpunimit të Shangait (SCO), paradën ushtarake në Pekin për 80-vjetorin e fitores ndaj Japonisë në Luftën e Dytë Botërore, si dhe me takime të nivelit të lartë mes dy aleatëve strategjikë.
Në krah të presidentit kinez Xi Jinping, Putin do të marrë pjesë në ceremonitë zyrtare së bashku me liderët e Koresë së Veriut, Iranit dhe Kubës – një mesazh simbolik i konsolidimit të bllokut anti-perëndimor.
Analistët theksojnë se në qendër të bisedimeve do të jetë lufta në Ukrainë dhe koordinimi i qëndrimeve mes Moskës e Pekinit, ndërkohë që SHBA po rrisin presionin për t’i dhënë fund konfliktit. Rusia, nga ana tjetër, kërkon garanci për mbështetje ekonomike nga Kina dhe avancim të projekteve energjetike, përfshirë gazsjellësin “Power of Siberia 2”.
Tregtia mes dy vendeve ka arritur nivele rekord, mbi 240 miliardë dollarë vetëm në vitin 2024, duke e bërë Kinën importuesin kryesor të naftës, qymyrit dhe së shpejti edhe të gazit rus.
Një tjetër temë që ngre shqetësim në Perëndim është bashkëpunimi ushtarak. Pekini nuk ka dhënë ndihmë të drejtpërdrejtë me armë, por sipas burimeve amerikane, furnizon pjesën dërrmuese të pajisjeve industriale dhe gjysmëpërçuesve që Rusia përdor për të forcuar kapacitetin e saj ushtarak.
Prania e Kim Jong-un shton një element tjetër tensioni. Vëzhguesit e shohin si përpjekje të Kinës për të balancuar ndikimin e Rusisë mbi Phenianin, i cili tashmë ka dërguar mbështetje direkte për Moskën në këmbim të armatimeve moderne.
Ndërkohë, Kina vazhdon të mbajë një pozicion “neutral”, duke u shfaqur si ndërmjetëse, por pa ushtruar presion real për paqe. Analistët vlerësojnë se Pekini po ndjek një strategji afatgjatë, duke fituar nga afrimi me Rusinë pa u përballur me kosto të menjëhershme nga Perëndimi.
