Organizata e Veteranëve të Luftës së Ushtrisë Çlirimtare të Kosovës (OVL-UÇK) ka refuzuar publikisht kërkimfaljen e kryetarit të Kuvendit të Kosovës, Dimal Basha, lidhur me një punim shkencor të vitit 2012, në të cilin ai, si bashkautor, kishte lidhur pjesëtarë të UÇK-së me krimin e organizuar dhe trafikun e drogës.
Në reagimin e saj zyrtar, OVL-UÇK e cilësoi kërkimfaljen si të pamjaftueshme dhe jo të sinqertë, duke theksuar se qëndrimet e Bashës në atë publikim përputhen me narrativën serbe që synon delegjitimimin e luftës çlirimtare të UÇK-së.
“Qëndrimet e shprehura në atë punim cenojnë rëndë vlerat e luftës sonë çlirimtare dhe bien ndesh me betimin kushtetues që z. Basha ka dhënë si deputet dhe kryetar i Kuvendit,” thuhet në deklaratën e organizatës.
Veteranët e luftës kanë kërkuar shkarkimin e menjëhershëm të Bashës nga posti i kryekuvendarit, duke njoftuar se tashmë i kanë drejtuar një kërkesë zyrtare deputetëve të Kuvendit për të iniciuar procedurat për largimin e tij.
Në deklaratë, OVL-UÇK rikujton se Ushtria Çlirimtare e Kosovës ka qenë një forcë e organizuar për mbrojtjen e popullit shqiptar nga represioni serb, dhe se përpjekjet për ta kriminalizuar atë pas luftës përbëjnë një mohim të historisë dhe sakrificës së saj.
