Lidhja Demokratike e Kosovës (LDK) ka zhvilluar sot një mbledhje nën udhëheqjen e kryetarit Lumir Abdixhiku, ku morën pjesë kryetarët e degëve të partisë nga mbarë vendi.
Në njoftimin e LDK-së bëhet e ditur se në takim është diskutuar përgatitja për hapjen zyrtare të fushatës zgjedhore, e cila do të mbahet më 13 shtator, si dhe organizimi i plotë i strukturave të partisë në të gjitha komunat e Kosovës.
“LDK hyn në këtë garë e përgatitur në çdo komunë, me program të qartë e realist, duke ofruar zgjidhje konkrete për problemet e qytetarëve dhe një vizion të pastër për të ardhmen e Kosovës,” thuhet në komunikatën e partisë.
Në njoftim theksohet se kandidatët e LDK-së synojnë të ofrojnë “udhëheqje të pastër, të drejtë dhe të përgjegjshme”, ndërsa fushata e kësaj partie shihet si më shumë se një garë zgjedhore – një “betejë për të ardhmen e Kosovës”.
Sipas partisë, uniteti dhe përkushtimi i treguar në mbledhjen e sotme janë dëshmi se LDK është e gatshme për fitore dhe për të ofruar udhëheqjen që, siç theksohet, “Kosova e meriton”.
