Presidentja e Kosovës, Vjosa Osmani, ka pritur sot në takim ambasadorin e Gjermanisë në Prishtinë, Jörn Rohde, me të cilin ka biseduar rreth zhvillimeve më të fundit politike dhe të sigurisë në vend.
Në fokus të diskutimit ishte procesi i konstituimit të institucioneve pas zgjedhjeve të 9 shkurtit, si dhe dinamika e skenës politike.
Presidentja Osmani ka riafirmuar se do të vazhdojë të veprojë në përputhje të plotë me Kushtetutën dhe ligjet e Kosovës, duke garantuar stabilitet institucional dhe respektimin e vullnetit të qytetarëve.
Gjatë takimit, ajo ka vlerësuar marrëdhëniet e ngushta me Gjermaninë, duke theksuar rëndësinë e partneritetit strategjik ndërmjet dy vendeve.
“Bashkëpunimi me Gjermaninë është i palëkundur dhe i një rëndësie të veçantë për Kosovën. Do të vazhdojmë përpjekjet për ta thelluar këtë partneritet dhe për të avancuar rrugëtimin tonë euroatlantik,” tha Osmani.
Ambasadori Rohde, nga ana e tij, rikonfirmoi mbështetjen e Gjermanisë për Kosovën, veçanërisht në proceset demokratike dhe integruese.
