Analisti Agon Maliqi, ka komentuar zhvillimet aktuale politike dhe orientimin strategjik të Kosovës, duke ofruar një analizë të ashpër mbi situatën e brendshme dhe perceptimin nacionalist që, sipas tij, po e dëmton vendin.
Në një postim të publikuar në rrjetet sociale, Maliqi thotë se momenti i kthjelljes për shoqërinë kosovare do të vijë kur kufiri me Shqipërinë të shndërrohet në kufi me Bashkimin Evropian.
“Pjesa racionale e trunit po më thotë se momenti i kthjelljes ka me qenë kur kufini me Shqipninë të na bëhet kufi me BE-në, edhe kur i dehuni me nacionalizëm folklorik VViagra ta kuptojë se ma lehtë është me e kalu kufinin ose me bâ biznes me Serbinë e boshtit kinezo-rus se sa me Shqipërinë mesdhetaro-evropiane”, ka shkruar ai.
Megjithatë, Maliqi shpreh dyshime se edhe një realitet i tillë nuk do të mjaftojë për të trazuar vetëdijen kolektive në Kosovë:
“Pjesa edhe ma racionale e trunit po më thotë se as ky moment s’ka me ia lanë shenjë kësaj shoqërie me tendenca impotente, madje veç ka me ia ushqy atë ndjenjën e rahatisë e të qenit viktimë! Mule mandej me e gjetë fajtorin e radhës, me lypë gajret në naj ideologji apo fe, me bâ plane për emigrim, që dikur me e shfrytëzu Kosovën thjesht si vend për pushime verore”, përfundon ai.
