Oborri i palestrës së qytetit u mbush mbrëmjen e së premtes me entuziazmin dhe energjinë e rinisë lipjanase, në një tubim që shënoi një tjetër moment të rëndësishëm në fushatën e kryetarit aktual dhe kandidatit për kryetar, Imri Ahmeti.
Në një atmosferë të ngrohtë dhe dinamike, Ahmeti falënderoi Forumin e Rinisë për angazhimin e palëkundur dhe përkushtimin që, sipas tij, po shndërrohet çdo ditë në vepra konkrete për të ardhmen e Lipjanit.
“Rinia jonë beson në punë, jo në propagandë. Ajo është krenaria e Lipjanit dhe motivi ynë për të vazhduar me forcë e përgjegjësi të lartë drejt zhvillimit të vendit tonë,” u shpreh ai.
Ahmeti theksoi se data 12 tetor do të jetë vendimtare për të ardhmen e qytetit, duke e cilësuar zërin e rinisë si faktor kyç në ndërtimin e një Lipjani ku çdo i ri ka arsye të qëndrojë, të punojë dhe të ëndërrojë. “Bashkë do të vazhdojmë ta ndërtojmë një Lipjan ku çdo i ri ka arsye të qëndrojë,” tha ai, duke nënvizuar rëndësinë e pjesëmarrjes aktive të të rinjve në vendimmarrje.
Në fjalën e tij, Ahmeti vuri në dukje se energjia e rinisë është jo vetëm simbol i gjallërisë qytetare, por edhe motor i zhvillimit të qëndrueshëm. Ai premtoi se mbështetja për të rinjtë do të mbetet prioritet në mandatin e ardhshëm, duke përfshirë investime në arsim, punësim dhe hapësira për inovacion.
