Sot, më 6 shtator 2025, Policia e Kosovës feston 26 vjet nga themelimi i saj, një përvjetor që shënon jo vetëm një moment historik institucional, por edhe një reflektim mbi rrugëtimin e sigurisë dhe rendit publik në vend.
Më 6 shtator 1999, në përputhje me Rezolutën 1244 të Kombeve të Bashkuara, Misioni i OSBE-së në Kosovë hapi zyrtarisht Shkollën e Policisë, duke nisur trajnimin e gjeneratës së parë të pjesëtarëve të Policisë së Kosovës.
Kjo gjeneratë përbëhej nga 176 kandidatë, të cilët pas përfundimit të suksesshëm të trajnimit, u angazhuan në shërbimin policor në të gjithë territorin e vendit, duke u bërë themeli i një institucioni që sot numëron mijëra pjesëtarë.
Gjatë këtyre dy dekadave e gjysmë, Policia e Kosovës ka kaluar nëpër faza të rëndësishme zhvillimi, duke u transformuar nga një trupë e sapoformuar në një institucion modern të sigurisë, të angazhuar në ruajtjen e rendit, luftën kundër krimit dhe mbrojtjen e të drejtave të qytetarëve.
Në kuadër të shënimit të këtij jubileu, sot mbahet ceremonia qendrore në Drejtorinë e Përgjithshme të Policisë së Kosovës, ku pritet të marrin pjesë përfaqësues të institucioneve vendore dhe ndërkombëtare, si dhe ish-pjesëtarë të gjeneratës së parë, në një akt simbolik nderimi për kontributin e tyre.
