Policia e Kosovës ka njoftuar se ka arrestuar një person në komunën e Mitrovicës së Jugut nën dyshimet për veprat penale “Keqpërdorim i pozitës apo autoritetit zyrtar” dhe “Falsifikim i dokumentit zyrtar”.
Sipas njoftimit, hetimet janë zhvilluar nga Drejtoria për Hetimin e Krimeve Ekonomike dhe Korrupsionit, pas pranimit të një informate për parregullsi në një kontratë të subvencionimit. Gjatë procedurave hetimore janë siguruar prova që lidhen me ndërhyrjen e kundërligjshme në vlerën e kontratës, duke i shkaktuar dëm buxhetit publik.
I dyshuari është intervistuar në prani të avokatit mbrojtës dhe, pas konsultimit me prokurorin kompetent, ndaj tij është shqiptuar masa e ndalimit policor për 48 orë.
Policia e Kosovës ka theksuar se, në bashkëpunim me autoritetet tjera kompetente, mbetet e përkushtuar në parandalimin dhe luftimin e veprimeve që dëmtojnë interesin publik dhe buxhetin e shtetit.
