Asambleja Kombëtare e Francës ka rrëzuar qeverinë e kryeministrit François Bayrou, pas humbjes së votëbesimit që ai vetë e kishte kërkuar. Me 364 vota kundër dhe 194 në favor, deputetët i dhanë fund mandatit të qeverisë, duke hapur një kapitull të ri të pasigurt politik në vend, raporton BBC.
Rezultati përbën një goditje të rëndë për Presidentin Emmanuel Macron, i cili tashmë përballet me presion të madh për të rindërtuar një shumicë parlamentare funksionale ose për të marrë vendimin e vështirë për zgjedhje të parakohshme.
Në fjalimin e tij para votimit, Bayrou kishte deklaruar se “rreziku më i madh është të mos marrësh asnjë rrezik”, duke e përshkruar mocionin e besimit si një moment kyç për të ardhmen politike dhe institucionale të Francës. Megjithatë, kundërshtimi i gjerë nga forcat opozitare tregoi mungesën e mbështetjes për qasjen e tij reformuese dhe mënyrën e drejtimit të qeverisë.
Rrëzimi i qeverisë pritet të shkaktojë një krizë të re politike në Paris, duke vënë në provë jo vetëm kohezionin e kampit të Macron-it, por edhe stabilitetin institucional të vendit në prag të sfidave të mëdha ekonomike dhe sociale.
