Një rrëfim i pazakontë ka ardhur nga politika finlandeze. Deputetja Anna Kontula, e cila aktualisht po shërben mandatin e saj të katërt në Parlament, ka zbuluar publikisht se për vite me radhë ka punuar si prostitutë, përpara se të hynte në politikë.
Në një intervistë për median Helsingin Sanomat, e botuar të shtunën, 48-vjeçarja deklaroi se nuk turpërohet nga kjo e shkuar, përkundrazi, e konsideron si një përvojë që e ndihmoi në formësimin e karrierës së saj politike.
Kontula tha se nisi të punonte si eskortë që në moshën 16-vjeçare, ndërsa jetonte në një konvikt studentor. Sipas saj, vendimi erdhi si pasojë e vështirësive financiare, por edhe i një kurioziteti personal. “Nëse doja të siguroja jetesën… ishte një zgjidhje mjaft racionale,” u shpreh ajo.
Deputetja punoi në industrinë e seksit me ndërprerje për gati dy dekada dhe gjatë asaj kohe u bë një avokate e hapur e të drejtave të punonjësve të kësaj fushe. Në vitin 2002, ajo bashkëthemeloi sindikatën e punonjësve të seksit SALLI dhe botoi artikuj ku sfidonte perceptimet publike mbi industrinë.
Kur Finlanda miratoi në vitin 2006 një ligj që kufizonte pjesërisht blerjen e shërbimeve seksuale, Kontula e përshëndeti atë si një fitore të pjesshme, duke theksuar se përfshinte edhe mbrojtje për viktimat e trafikimit.
