Një postim i Kombëtares U21 të Spanjës ka ngjallur reagime në Prishtinë, pasi për paralajmërimin e ndeshjes së sotme ndaj Kosovës është përdorur termi “Territori i Kosovës”, në vend të emrit zyrtar të shtetit.
Në grafikun e publikuar nga Federata Spanjolle e Futbollit shkruhej: “Territori i Kosovës – SPANJA”. Megjithatë, krahas këtij përcaktimi, është vendosur edhe emblema zyrtare e Federatës së Futbollit të Kosovës, e cila njihet nga UEFA dhe FIFA.
Ky veprim shihet si një kontradiktë në qasjen e Spanjës: nga njëra anë refuzon njohjen e pavarësisë së Kosovës, ndërsa nga ana tjetër përdor simbolet zyrtare të saj në kuadër të garave ndërkombëtare.
Ndeshja e vlefshme për kualifikueset e Kampionatit Evropian U21 do të zhvillohet sonte në stadiumin “Fadil Vokrri” në Prishtinë.
