Një tjetër incident alarmues ka tronditur misionin detar humanitar Global Sumud Flotilla, vetëm 24 orë pas sulmit ndaj anijes kryesore “Family”. Këtë herë, objektiv i një droni shpërthyes ka qenë “Alma”, një anije 33 metra e gjatë me flamur britanik, e ankoruar në brigjet e Sidi Bou Said, Tunizi, në pritje të nisjes drejt Gazës.
Me një ekuipazh ndërkombëtar në bord, “Alma” ishte pjesë e flotës që synon të thyejë simbolikisht dhe praktikisht rrethimin e Gazës, duke transportuar aktivistë dhe ndihma humanitare. Anija priste koordinimin logjistik me delegacionin italian në Sicili, për t’u bashkuar me grupet spanjolle dhe tuniziane në rrugëtimin drejt Gazës.
Sipas dëshmive të aktivistëve në bord, sulmi ndodhi gjatë natës, kur një dron fluturoi mbi kuvertën e sipërme dhe hodhi një mjet shpërthyes që shkaktoi zjarr. “E pashë dronin, ishte vetëm disa metra larg. Pesë sekonda më pas hodhi diçka dhe flakët shpërthyen menjëherë”, rrëfen një prej aktivistëve. Fatmirësisht, zjarri u neutralizua shpejt dhe nuk pati të lënduar.
Ky është sulmi i dytë brenda 24 orëve ndaj flotës Global Sumud, pas dëmtimit të anijes “Family” ku udhëtonin figura të njohura si Greta Thunberg, Yasemin Acar dhe Thiago Avila.
Ndërkohë, në molin e Sidi Bou Said janë mbledhur qindra persona – familjarë, miq dhe aktivistë – që ruajnë flotën nga përpjekjet e sabotimit. Por kërcënimet ajrore mbeten jashtë kontrollit të tyre.
Në një deklaratë të shkurtër, organizatorët dënojnë ashpër sulmet:
“Këto akte ndodhin ndërsa agresioni izraelit në Gaza intensifikohet. Janë të orkestruara për të shpërqendruar vëmendjen dhe për të fundosur misionin tonë. Por ne nuk do të ndalemi.”
Flotilla riafirmon karakterin paqësor dhe jo të dhunshëm të misionit, duke theksuar se solidariteti me popullin palestinez nuk do të zbehet përballë sabotimeve.
