Atletja kosovare, Gresa Bakraçi, do të mbajë flamurin e Kosovës në Kampionatin Botëror të Atletikës, që zhvillohet në Tokio të Japonisë nga 13 deri më 21 shtator.
Bakraçi do të garojë në disiplinën 1500 metra, me garën e parë që e pret më 13 shtator. Shpresat janë që ajo të ketë një paraqitje dinjitoze dhe të arrijë deri në fazën gjysmëfinale të këtij kampionati prestigjioz.
Në këtë ngjarje madhore, Gresës i janë bashkuar edhe përfaqësues të Federatës Atletike të Kosovës (FAK): Halil Sylejmani, kryetar i FAK dhe Arta Kelmendi, anëtare e Kryesisë së FAK.
Të dy do të marrin pjesë gjithashtu në Kongresin e 55-të të Atletikës Botërore (World Athletics Congress), i cili do të zgjasë tre ditë dhe konsiderohet një ngjarje e rëndësishme jo vetëm për të ardhmen e atletikës botërore, por edhe për zhvillimin e saj në Kosovë.
Kosova do të jetë kështu pjesë aktive e garave dhe vendimmarrjeve më të larta të atletikës botërore.
