Transmetuesi publik i Irlandës, RTÉ, ka paralajmëruar se vendi mund të tërhiqet nga Eurovisioni 2026 nëse Izraeli lejohet të marrë pjesë në këtë garë muzikore.
Në një deklaratë publike, RTÉ ka bërë të ditur se pjesëmarrja në konkurs “do të ishte e papranueshme, duke pasur parasysh humbjen e vazhdueshme dhe të papërshkrueshme të jetëve në Gaza”.
Ky qëndrim i fortë vjen në kohën kur debati mbi përfshirjen e Izraelit në ngjarje ndërkombëtare kulturore po rritet, pas zhvillimeve të fundit në Lindjen e Mesme.
Megjithatë, RTÉ ka sqaruar se një vendim përfundimtar ende nuk është marrë dhe se do të merret pasi Unioni Evropian i Transmetimeve (EBU), organizatori i Eurovisionit, të japë qëndrimin e tij zyrtar mbi këtë çështje.
Eurovision 2026 pritet të mbahet në maj të vitit të ardhshëm në Vjenë, Austri.
