Sekretari i Shtetit i SHBA-së, Marco Rubio, ndodhet sot në Izrael për një vizitë zyrtare, ku pritet të takohet me Kryeministrin Benjamin Netanyahu dhe të vizitojë Murin Perëndimor në Jerusalem.
Vizita vjen në një moment tensioni diplomatik, pas sulmit të forcave izraelite (IDF) ndaj udhëheqjes së Hamasit në Doha, Katar – një bastisje që ka nxitur reagime ndërkombëtare.
Përpara nisjes nga Uashingtoni, Rubio deklaroi se Shtetet e Bashkuara “nuk janë të kënaqura” me këtë veprim të Izraelit, por theksoi se nuk e cenon marrëdhënien strategjike mes dy vendeve.
“Kjo nuk e ndryshon natyrën e marrëdhënies sonë me izraelitët, por do të duhet të flasim për këtë – kryesisht për ndikimin që ka në përpjekjet për armëpushim,” tha Rubio.
Ai shtoi se do të diskutohet edhe ndikimi i zhvillimeve të fundit në përpjekjet për të arritur objektivat e administratës Trump: “mposhtjen e Hamasit, përfundimin e luftës dhe kthimin e pengjeve – të gjitha menjëherë”.
Sipas Departamentit të Shtetit të SHBA-së, qëllimi i vizitës është të sigurojë Izraelin për mbështetjen amerikane, përpara një vendimi të mundshëm të disa vendeve në Asamblenë e Përgjithshme të OKB-së për të njohur një shtet palestinez.
Operacionet e IDF-së: Pretendime për vrasjen e 20 anëtarëve të Hamasit
Ndërkohë, Forcat e Mbrojtjes të Izraelit (IDF) pretendojnë se gjatë operacioneve të muajit të fundit kanë vrarë mbi 20 anëtarë të dyshuar të Hamasit, përfshirë disa që kishin marrë pjesë në sulmin e 7 tetorit 2023.
Mes të vrarëve raportohen: Yusef Jumaa, komandant i qelizës së Hamasit që kreu sulmin në Kibbutz Alumin; Samir Laqta, komandant i një njësie të Forcave Nukhba (njësia speciale e Brigadave Al-Qassam); Issa Abbas, komandant i një njësie të Batalionit Zeitoun; Ismail Adwan, Ahmed Adwan dhe Mohammed Adwan, të lidhur me Batalionin e Hamasit në Beit Hanoun.
