48 
James Rubin, ish-ndihmëssekretar amerikan i Shtetit gjatë luftës në Kosovë, pritet të japë sot dëshminë e tij në mbrojtje të ish-presidentit të Kosovës, Hashim Thaçi. Ai ka mbërritur tashmë në objektin e Gjykatës Speciale në Hagë.
Seanca në Dhomat e Specializuara të Kosovës, me seli në Holandë, do të nisë në orën 09:00. Për publikun, ajo do të transmetohet me 45 minuta vonesë përmes faqes zyrtare të gjykatës.
Rubin është dëshmitari i parë i ftuar nga mbrojtja e Thaçit, e cila ka paralajmëruar paraqitjen e rreth 11 dëshmitarëve në këtë proces gjyqësor. Pas përfundimit të kësaj faze, seancat do të vazhdojnë me dëshmitarët e mbrojtjes së ish-kryetarit të Kuvendit të Kosovës, Jakup Krasniqi.
