Kjo gjë pritej, por shkoi më bukur edhe sesa mendohej.
Anis Mehmeti ishte lojtari i dytë më i mirë i javës në kategorinë e dytë angleze, pas paraqitjes së tij të shkëlqyer këtë të shtunë.
Vetë faqja zyrtare e ligës Championship, e vendosi yllin ofensiv shqiptar në formacionin e ndeshjeve të kësaj jave, i vetmi lojtar i Bristol Cityt që ia doli.
24-vjeçari ishte i papërmbajtshëm në pjesën e parë në fushën e Sheffield Wednesday, në fitoren 3-0, duke detyruar fillimisht kundërshtarët që të shkaktonin autogol, pastaj duke dhënë një asist tepër të saktë për rrjetën e dytë nga Jakobsen, ndërsa kryeveprën e përfundoi në 38’ me golin personal.
Të mos harrojmë se ai goditi edhe shtyllën.
Për të gjitha këto, faqja zyrtare e Championshipit i dha notën 8.9, që është e dyta më e lartë e javës së pestë, pas 10-ës absolute të merituar nga ylli i Ipswich Town, Jaden Philogene, që shënoi 3 gola.
Mehmeti ka qenë krejt i veçantë këtë sezon, me tri rrjeta e dy asistë në pesë ndeshje, me vlerësime të larta, duke qenë më i miri i Bristol Cityt deri tani.
Skuadra e tij është në vend të tretë në renditje, me diferencën e golave më të mirë në ligë dhe shanset janë të mëdha për t’u ngjitur në Premier, shkruan abcnews.
Gjithsesi, që nga qershori 2023, ylli i lindur në Londër nuk është thirrur në kombëtare, por shpreson që trajneri Sylvinho të ndërrojë mendjen pikërisht për sfidën kundër Serbisë.
