Trajneri i Atletico Madrid, Diego Simeone, ka folur para ndeshjes hapëse të Ligës së Kampionëve ndaj Liverpool-it në “Anfield”.
Argjentinasi rikujtoi fitoren e fundit kundër kampionëve anglezë, por theksoi se kjo sfidë do të jetë edhe më e vështirë.
“Është gjithmonë emocionuese të përballesh me një kundërshtar të tillë, me një stadium dhe atmosferë fantastike. Liverpool ka një trajner që i ka udhëhequr në nivelet më të larta dhe do të jetë shumë e vështirë. Ne do të përpiqemi t’i dëmtojmë dhe ta çojmë ndeshjen aty ku na përshtatet më mirë,” tha Simeone.
Sa i përket mungesave në skuadër, trajneri i Atletico-s theksoi se ato janë pjesë e futbollit.
“Nuk janë asnjëherë pozitive, por ne jemi të fokusuar te ata që do të luajnë. Në fund, është njëmbëdhjetë kundër njëmbëdhjetë”, pohoi ai.
Simeone pranoi forcën e Liverpool-it, duke veçuar shpejtësinë në tranzicione dhe lojën vertikale të anglezëve, por u shpreh i bindur se ekipi i tij është gati për sfidën.
“Do të jetë një ndeshje e vështirë, por ne do të përpiqemi ta menaxhojmë sipas mënyrës sonë”, përfundoi Simeone
