Partia e Socialistëve Evropianë ka votuar për të përjashtuar përgjithmonë partinë Smer të Sllovakisë, të udhëhequr nga kryeministri Robert Fico, sipas katër zyrtarëve që janë në dijeni të vendimit.
Udhëheqja e partisë socialiste mori vendimin unanim në një takim të enjten e kaluar, sipas zyrtarëve, të cilëve iu dha anonimiteti për të folur lirisht rreth diskutimeve të brendshme.
Vendimi do të duhet të ratifikohet në një takim në Amsterdam midis 16 dhe 18 tetorit.
Vendimi vjen, pasi Fico i shtrëngoi dorën Vladimir Putinit në Moskë në maj, përpara festimeve vjetore të Ditës së Fitores në Rusi.
Fico vizitoi Pekinin në javën e parë të shtatorit, ku u takua me presidentin kinez Xi Jinping dhe atë të bjellorusisë Alexander Lukashenko.
Anëtarësimi i Smer në Socialistët Evropianë u pezullua në tetor 2023, së bashku me partinë e saj aleate Hlas (ky i fundit do të mbetet i pezulluar, por ende jo i përjashtuar, thanë zyrtarët).
Fico ka qenë gjithnjë e më shumë në kundërshtim me socialistët evropianë, duke ngadalësuar miratimin e sanksioneve kundër Rusisë dhe duke u akuzuar për minimin e sundimit të ligjit në Bratislavë.
Ligjvënësit e BE-së të Smer dhe zyra e shtypit e partisë nuk iu përgjigjën kërkesave për koment. Socialistët evropianë gjithashtu nuk iu përgjigjën një kërkese për koment./Politico.
