Paneli Zgjedhor për Ankesa dhe Parashtresa (PZAP) ka refuzuar dy ankesat e Lëvizjes Vetëvendosje (LVV) për “nxitje të urrejtjes” ndaj Partisë Demokratike të Kosovës (PDK) dhe Listës Serbe.
LVV-ja kishte parashtruar ankesë për deklaratat e kandidatit për kryetar të PDK-së në Skenderaj, Sami Lushtaku, i cili në një emision ishte shprehur: “Ata që nuk e respektojnë Kushtetutën, nuk i respektojnë ligjet e Kosovës, nuk e respektojnë Prokurorinë, unë mendoj se ata duhet t’i ngrehim zvarrë nëpër rrugët e Prishtinës.”
Megjithatë, PZAP-ja konstatoi se kjo deklaratë nuk i drejtohej asnjë personi konkret apo ndonjë subjekti politik, dhe për këtë arsye nuk u gjet asnjë shkelje e rregullave zgjedhore në dëm të ndonjë subjekti politik.
Gjithashtu, LVV-ja kishte paraqitur ankesë ndaj Listës Serbe për shkak të një parulle të ekspozuar gjatë fushatës në Mitrovicën e Veriut me mbishkrimin “Svi za brata Milana”, duke pretenduar se ajo i referohej Milan Radoiçiqit – person i kërkuar nga institucionet e Kosovës si organizator i sulmit në Banjskë në vitin 2023.
Por sipas vendimit të PZAP-së, pala ankuese nuk ka ofruar dëshmi të qarta dhe bindëse që në këtë parullë aludohej te Milan Radoiçiqi.
Sipas panelit, në parullë përmendet vetëm emri ‘Milan’, i cili është emri i kandidatit për kryetar të komunës së Mitrovicës së Veriut, Milan Radojeviq.
