Zëvendëskryeministri dhe Ministri i Jashtëm italian, Antonio Tajani, njoftoi sot se Italia do të bashkohet më 22 shtator në Nju Jork me një deklaratë në Asamblenë e Përgjithshme të OKB-së, e cila synon krijimin e një shteti të pavarur palestinez dhe përfundimin e armiqësive në rajon.
Megjithatë, Tajani sqaroi se kjo mbështetje nuk do të thotë njohje të menjëhershme të Palestinës si shtet.
“Njohja e një shteti pa u krijuar kushtet për lindjen e tij nuk do të ketë efekt tjetër përveçse do të shtyjë tutje paqen,” deklaroi ai në Parlamentin italian.
Ky qëndrim tregon një ndryshim të kujdesshëm në politikën e jashtme të Romës, që, ndryshe nga disa vende që kanë njohur Palestinën në mënyrë të njëanshme, mbështet fuqimisht krijimin e shtetit palestinez brenda kornizave të OKB-së dhe kërkon një përfshirje më aktive në nismat ndërkombëtare për zgjidhjen me dy shtete.
