Trajneri i Manchester City, Pep Guardiola, ka deklaruar se Erling Haaland po zhvillon futbollin më të mirë të karrierës së tij, duke theksuar se norvegjezi është “më i mirë se në sezonin e tripletës”.
Haaland bëri histori që në vitin e parë me City-n, duke fituar Premier League, FA Cup dhe Champions League, ndërsa shënoi plot 52 gola në të gjitha kompeticionet – një rekord i paparë në futbollin anglez. Ai u shpall golashënuesi më i mirë i Premier League-s, si dhe fitoi të gjitha çmimet individuale të mundshme.
Edhe pse kampionët në fuqi nuk e kanë nisur sezonin me ritmin e vitit të kaluar, Haaland ka qenë vendimtar që në start: pesë gola në katër ndeshjet e para të Premier League-s dhe një tjetër në Champions League. Në derbin kundër Manchester United, sulmuesi 25-vjeçar shkëlqeu me dopietën e tij, duke marrë vlerësimet maksimale nga Guardiola.
“Erling ka qenë i jashtëzakonshëm. Këtë sezon është më i mirë se kurrë. Shumë dinamik, shumë i përfshirë në lojë. Ne duam gola prej tij, por edhe ndihmë në çdo aspekt të lojës,” u shpreh Guardiola.
Në të njëjtën linjë është edhe ish-mbrojtësi i United, Gary Neville, i cili e cilësoi Haaland-in si sulmuesin më të mirë qendror në botë:
“Unë nuk e ndryshoj mendimin tim. Ai është sulmuesi më i mirë në botë. Shënon pa pushim, por mendoj se ende mund të japë më shumë: të mbajë topin, të fitojë dyluftime, të ndihmojë në mbrojtje. Potenciali i tij është i frikshëm,” tha Neville.
Norvegjezi vazhdon të thyejë rekorde edhe në arenën evropiane. Goli i tij kundër Napolit në fitoren 2-0 e bëri lojtarin më të shpejtë që arrin kuotën e 50 golave në Champions League. Guardiola është i bindur se Haaland mund të thyejë edhe rekordin e Cristiano Ronaldos me 141 gola në këtë kompeticion:
“Nëse mbetet i shëndetshëm, pa dyshim që mund ta arrijë. Ai është në nivelin e Van Nistelrooy, Lewandowskit, Cristiano-s dhe Messit. Të kesh Haaland në ekip është një privilegj i madh,” tha tekniku katalanas.
Manchester City përballet këtë të dielë me Arsenalin në “Emirates”, një ndeshje që pritet të jetë test i vërtetë për skuadrën e Guardiolës. Megjithatë, me një Haaland në superformë, kampionët duken të gatshëm për çdo sfidë.
