Presidenti i Serbisë, Aleksandar Vuçiç, ka zhvilluar një takim me sekretarin amerikan të Shtetit, Marco Rubio, në Nju Jork, në kuadër të punimeve të Asamblesë së Përgjithshme të OKB-së. Bisedimet, sipas të dyja palëve, janë fokusuar në forcimin e dialogut strategjik mes Beogradit dhe Uashingtonit, si dhe në thellimin e bashkëpunimit ekonomik.
Vuçiç tha se gjatë takimit u trajtuan çështje që lidhen me ekonominë dhe tregtinë, veçanërisht tarifat e vendosura nga SHBA ndaj Serbisë. Në një reagim në rrjete sociale, ai e përshkroi bisedën si konstruktive dhe me interes të përbashkët për zhvillimin e marrëdhënieve.
Nga ana tjetër, zëdhënësi i Departamentit amerikan të Shtetit, Tommy Pigott, theksoi se Rubio dhe Vuçiç diskutuan edhe për pjesëmarrjen e SHBA-së në ekspozitën ndërkombëtare EXPO 2027, që do të mbahet në Beograd, si një hap i rëndësishëm në zgjerimin e partneritetit mes dy vendeve.
Takimet e delegacionit serb në Nju Jork u shfrytëzuan gjithashtu për të përsëritur qëndrimin e Beogradit për dialogun me Kosovën. Vuçiç nënvizoi rolin e Shteteve të Bashkuara në ruajtjen e sigurisë së serbëve në Kosovë dhe falënderoi për mbështetjen që, sipas tij, Uashingtoni po i jep procesit të dialogut Beograd–Prishtinë.
Në të njëjtën kohë, presidentja e Kosovës, Vjosa Osmani, e cila po përfaqëson vendin në Asamblenë e OKB-së, ka kërkuar përshpejtimin e procesit të anëtarësimit të Kosovës në NATO, duke e cilësuar këtë si një garanci për paqen dhe stabilitetin rajonal.
Marrëdhëniet Kosovë–Serbi kanë qenë së fundmi në fokus edhe të diplomacisë amerikane. Ambasada e SHBA në Prishtinë ka rikujtuar ndërhyrjen e mëparshme të ish-presidentit Donald Trump në përpjekje për të shmangur tensionet mes dy vendeve, duke e lidhur atë me angazhimin e vazhdueshëm amerikan për stabilitetin në Ballkan.
