Në një fjalim të drejtpërdrejtë dhe të ngarkuar me mesazhe politike, kryeministrja italiane Giorgia Meloni u shfaq në Asamblenë e Përgjithshme të Kombeve të Bashkuara në Nju Jork me një qëndrim të qartë ndaj dy prej krizave më të mprehta globale: agresionin rus në Ukrainë dhe konfliktin në Lindjen e Mesme.
Meloni akuzoi Moskën për shkelje të qëllimshme të Nenit 2 të Kartës së OKB-së, duke theksuar se Rusia ka cenuar pavarësinë dhe integritetin territorial të Ukrainës me synimin për të aneksuar territore sovrane.
Ajo vuri në dukje mungesën e vullnetit të Kremlinit për të negociuar paqen, duke paralajmëruar se pasojat e këtij agresioni shkojnë përtej kufijve të luftës dhe rrezikojnë stabilitetin global.
Ndërsa dënoi sulmin e Hamasit më 7 tetor, Meloni nuk kurseu kritikat ndaj Izraelit, duke e akuzuar se ka tejkaluar kufijtë e proporcionalitetit në reagimin e tij ushtarak.
Ajo paralajmëroi se Italia do të mbështesë disa nga sanksionet e propozuara nga Komisioni Europian kundër Izraelit, duke e cilësuar qasjen e Tel Avivit si të papranueshme.
Meloni i bëri thirrje Izraelit të dalë nga “kurthi i kësaj lufte”, duke apeluar për vlerat universale të demokracisë dhe historinë e popullit hebre.
“Duhet ta bëjë këtë për të pafajshmit, për demokracinë e tij, për vlerat universale të botës së lirë”, tha ajo.
Në përmbyllje, Meloni u shpreh e hapur për të kontribuar në propozimet e fundit të presidentit amerikan, të cilat janë diskutuar me vendet arabe. Ajo i cilësoi këto nisma si “veçanërisht interesante”, duke sinjalizuar gatishmërinë e Italisë për të luajtur një rol aktiv në zgjidhjen e krizave rajonale.
