Komuna e Prishtinës ka marrë vendim që të lirojë nga pagesa për shfrytëzimin e shërbimeve të “Trafikut Urban” disa kategori të caktuara të qytetarëve, përfshirë nxënësit e shkollave të mesme, studentët, mjekët dhe mësimdhënësit.
Sipas vendimit të nënshkruar nga kryetari i Komunës së Prishtinës, Përparim Rama, përjashtimi nga pagesa do të nisë nga data 1 tetor 2025 dhe do të vlejë për kategoritë si më poshtë:
Kategoritë e liruara nga pagesa për Trafikun Urban janë:
1.1. Stafi shëndetësor, administrativ, teknik dhe mbështetës i të gjitha institucioneve shëndetësore të Kryeqytetit;
1.2. Stafi mësimor, administrativ, teknik dhe mbështetës i të gjitha institucioneve arsimore të Kryeqytetit, përfshirë institucionet parashkollore;
1.3. Të gjithë punonjësit e administratës së Kryeqytetit në të gjitha nivelet, përfshirë edhe institucionet varëse të tij;
1.4. Të gjithë nxënësit e shkollave të mesme të Kryeqytetit;
1.5. Të gjithë studentët që jetojnë dhe studiojnë në Kryeqytet.
Vendimi hyn në fuqi menjëherë, ndërsa zbatimi praktik i tij do të fillojë nga 1 tetori 2025.
