Në një zhvillim të rëndësishëm për trashëgiminë kulturore shqiptare, kryeministri Edi Rama ka bërë publik lajmin për një zbulim të ri arkeologjik në Parkun Antik të Amantias (qarku i Vlores).
Arkeologët kanë identifikuar për herë të parë murin rrethues të qytetit të poshtëm të Amantias, një strukturë e fuqishme që mendohet të jetë ndërtuar në shekullin III para Krishtit dhe të jetë shkatërruar në shekullin VI pas Krishtit.
Ky zbulim hedh dritë mbi organizimin urbanistik dhe funksionimin publik të qytetit ilir, duke sjellë një kapitull të ri në historinë e kësaj qendre antike.
Fortifikimi i sapoevidentuar dëshmon për një nivel të lartë të zhvillimit arkitektonik dhe strategjik të Amantias, duke e pozicionuar atë si një nyje të rëndësishme në rrjetin e qytetërimeve ilire.
Përveç zbulimit, specialistët kanë kryer edhe ndërhyrje restauruese të domosdoshme për mbrojtjen e varreve monumentale, si dhe punime konservuese mbi monumentet e evidentuara vitet e fundit.
Këto ndërhyrje jo vetëm që ruajnë integritetin e trashëgimisë, por edhe pasurojnë peizazhin arkeologjik të parkut, duke e bërë Amantian një destinacion gjithnjë e më tërheqës për studiuesit dhe vizitorët.
