Komandanti i misionit të KFOR-it, Gjeneral Major Enrico Barduani, ka zhvilluar një vizitë lamtumire në Beograd ku është pritur nga Shefi i Shtabit të Përgjithshëm të Forcave të Armatosura të Serbisë, Gjeneral Milan Mojsiloviq.
Sipas njoftimit zyrtar të KFOR-it, të dy gjeneralët ndanë vlerësimet e tyre për situatën aktuale të sigurisë në rajon, duke shqyrtuar zhvillimet gjatë vitit të fundit dhe duke riafirmuar rëndësinë e komunikimit të rregullt dhe bashkëpunimit të ndërsjellë për ruajtjen e stabilitetit.
“Komandanti i KFOR-it e falënderoi ngrohtësisht Gjeneral Mojsiloviq për angazhimin e tij për bashkëpunim të vazhdueshëm për stabilitetin rajonal, duke theksuar se uniteti i përpjekjeve, koordinimi dhe respekti i ndërsjellë janë thelbësore për ruajtjen e paqes dhe sigurisë në të gjithë Ballkanin Perëndimor”, thuhet në njoftim.
Vizita vjen në përmbyllje të mandatit të Gjeneral Barduanit si udhëheqës i forcës paqeruajtëse të NATO-s në Kosovë, një pozicion që ka përfshirë bashkëpunim të vazhdueshëm me aktorë rajonalë për të garantuar siguri dhe liri të lëvizjes për të gjitha komunitetet në Kosovë.
