Bashkimi Evropian ka konfirmuar të hënën se ka rikthyer sanksionet ndaj Iranit, duke ndjekur një vendim të ngjashëm të Kombeve të Bashkuara për programin bërthamor të Teheranit.
“Sot, BE-ja riktheu sanksionet ndaj Iranit si përgjigje ndaj mosrespektimit të vazhdueshëm të marrëveshjes bërthamore. Dyert për negociata diplomatike mbeten të hapura,” thuhet në deklaratën e presidencës së BE-së.
Sanksionet e reja përfshijnë ngrirjen e pasurive të Bankës Qendrore të Iranit dhe disa bankave të tjera iraniane, si dhe ndalime udhëtimi për zyrtarë të caktuar iranianë. Po ashtu, BE-ja ka ndaluar blerjen dhe transportimin e naftës bruto iraniane, si dhe shitjen ose furnizimin me ar dhe pajisje të caktuara detare.
Ky vendim pason lëvizjen e Kombeve të Bashkuara, të cilat të dielën rivendosën embargon e armëve dhe sanksione të tjera ndaj Iranit, pas një procesi të nisur nga Britania, Franca dhe Gjermania.
Tri fuqitë evropiane e akuzojnë Iranin për shkelje të marrëveshjes së vitit 2015, e cila kishte për qëllim të parandalonte zhvillimin e një arme bërthamore. Teherani ka mohuar akuzat, duke këmbëngulur se programi i tij bërthamor ka qëllime paqësore dhe ka paralajmëruar se këto masa do të marrin një përgjigje të ashpër.
