Elon Musk, miliarderi ekscentrik dhe njëkohësisht pronari i platformës X (ish-Twitter), ka nisur një fushatë të ashpër kundër Netflix, duke i bërë thirrje ndjekësve të tij që të anulojnë abonimet në shenjë proteste.
Musk akuzon kompaninë se po promovon “axhendë pro-transgjinore” tek fëmijët dhe se po përdor përmbajtjen argëtuese si “propagandë të maskuar”.
Vetëm gjatë tre ditëve të fundit, Musk ka postuar ose shpërndarë mbi 25 mesazhe në X ku kërkon bojkotimin e Netflix. Sulmi filloi pas një postimi të faqes konservatore Libs of TikTok, që kritikonte serialin e animuar për fëmijë Dead End: Paranormal Park. Në këtë serial, një nga personazhet deklaron se është transgjinor – detaj që Musk e cilësoi si shembull i “indoktrinimit”.
Aktori transgjinor Zach Barack, që i dha zë personazhit Barney në serial, u shpreh se programi ka ndihmuar shumë fëmijë dhe prindër “duke shpëtuar edhe jetë”. Nga ana tjetër, Musk ka vijuar të shpërndajë postime nga përdorues që pretendojnë se kanë anuluar abonimet e tyre, madje duke i shoqëruar me meme ku Netflix paraqitet si “kalë troje” i propagandës.
Kreu i Tesla-s dhe SpaceX ka kritikuar edhe programe të tjera për “përmbajtje pro-trans”, si The Baby-Sitters Club apo Cocomelon. Ai ka përsëritur gjithashtu pretendime mbi politikat e brendshme të Netflix, duke e akuzuar kompaninë për diskriminim të punonjësve “të bardhë” dhe për lidhje të ngushta me Partinë Demokrate.
Debati merr një nuancë personale për Musk, pasi vajza e tij transgjinore, Vivian Wilson, është distancuar publikisht nga ai dhe ka ndryshuar ligjërisht emrin dhe gjininë në vitin 2022. Musk e ka përshkruar kujdesin afirmues të gjinisë si një “virus mendjeje” dhe e ka quajtur humbjen e saj “plagë të thellë”.
Netflix nuk ka reaguar deri më tani ndaj sulmeve. Kompania ka qenë shpesh nën vëmendje për debate të ngjashme: në vitin 2020 u përball me anulime abonimesh pas filmit Cuties, ndërsa në 2021 mbrojti specialen e komedianit Dave Chappelle, pavarësisht akuzave për transfobi.
Thirrjet e Musk pasojnë një klimë të tensionuar në industrinë e argëtimit. Vetëm ditë më parë, Disney u përball me reagime politike pas pezullimit të emisionit të Jimmy Kimmel, çka shkaktoi valë anulimesh edhe në Disney+.
Rasti Netflix pritet të thellojë ndarjen mes atyre që e shohin përfaqësimin LGBTQ+ si pjesë të barazisë dhe atyre që e konsiderojnë si “propagandë” të rrezikshme për fëmijët.
