Kryetari i Sindikatës së Bashkuar të Arsimit, Shkencës dhe Kulturës (SBASHK), Rrahman Jasharaj, ka ngritur shqetësimin lidhur me gjendjen ekonomike të mësimdhënësve në Kosovë. Ai ka deklaruar se pagat e tyre mbeten dukshëm më të ulëta krahasuar me kolegët në shtetet e rajonit.
“Ne jemi keq me pagat krahasuar me shtetet fqinje. Tek ne ka pasur vetëm lëvizje të vogla, ndërsa kërkesat tona për paga do t’i publikojmë së shpejti. Megjithatë, kjo pagë që e kemi tani është e ulët, sidomos krahasuar me Shqipërinë, Maqedoninë dhe vendet tjera fqinje,” tha Jasharaj.
Sipas tij, situata e tanishme është e padrejtë dhe e vështirë për punëtorët e arsimit, të cilët bartin një përgjegjësi të madhe në edukimin e brezave të rinj. SBASHK ka paralajmëruar se do të vazhdojë të kërkojë rritje të pagave dhe përmirësim të kushteve të punës për mësimdhënësit në Kosovë.
